Врховниот покраински суд во Минхен вчера осуди руски државјанин на 10 години затвор за планирање на убиство на чеченскиот дисидент Мохмад Абдурахманов во Германија, пишува германската новинска агенција ДПА.
Баварскиот суд го осуди Валид К. бидејќи покажал намера да изврши убиство и подготвувал тешко дело на насилство што го загрозува државниот поредок.
„Ќе продолжам со политичката активност во Германија“, изјавил осудениот по изрекувањето на пресудата.
Како што се наведува во пресудата, тој злосторството го подготвувал по налог на еден од роднините на чеченскиот лидер Рамзан Кадиров, кој е лојален на Владимир Путин.
Според сознанијата на судот, осудениот помеѓу март и јуни 2020 година примил наредба да убие дисидент. Набавил гасен пишол, го претворил во огнено оружје и ангажирал едно машко лице за да изврши убиство.
Двајцата во декември истата година ја следеле жртвата во Швабминхен во округот Аугсбург. Убиството го планирале со „знаење, одобрување и интерес“ на Кадиров, изјавил претседателот на судскиот совет Кристоф Визнер.
Обвинителството на крајот на јуни побара за обвинетото лице 11 години затворска казна.
Случајот потсетува на убиство на грузиски државјанин во Берлин во 2019 година, поради кој еден Русин на крајот на 2021 година е осуден на доживотен затвор. Москва тогаш ја отфрли пресудата за „државен тероризам“, која ја зголемила напнатоста во односите.