Националната единица за сузбивање на криумчарење мигранти и трговија со луѓе, под раководство на јавен обвинител од Основното јавно обвинителство за гонење на организиран криминал и корупција, реализираше случај за сторено кривично дело „трговија со дете“, кое го извршиле 11 лица.
„Во периодот од 2020 година до септември 2021 година Г.Ш., искористувајќи ја состојбата на немоќ и ранливост на детето, во претходен договор со С.С., А.П. и К.Х., го сториле делото така што го подведувале на вршење полови дејствија по пат на сексуална експлоатација и негово користење во сексуални активности или други форми на сексуална експлоатација со кривично пријавените Р.А., И.З., И.Е., А.М., Ќ.Ќ., Ф.А. и А. Ш., за паричен надомест во висина од 50 до 200 евра, а со цел стекнување за себе противправна имотна корист“, информира Министерството за внатрешни работи.
Оттаму велат дека врз основа на издадени наредби од судија на претходна постапка од Основен кривичен суд – Скопје, во Тетово на две локации извршени биле претреси во дом и други простории и лишени се од слобода осум лица, а во Гостивар лишени од слобода биле две лица. Едно лице се наоѓа надвор од државата.
„Одделот за сузбивање на организиран и сериозен криминал до Основното јавно обвинителство за гонење на организиран криминал и корупција поднесе кривична пријава против 11 лица, од кои Г.Ш. (51) од Тетово за кривично дело „трговија со дете“ (418-г став 2), С.С. (59) од Тетово за „трговија со дете“ (член 418-г став 1 и став 3), А.П. (67) од Тетово и К.Х. (50) од Гостивар за „трговија со дете“ (член 418-г став 1) и Р.А. (69), И.З. (55), И.Е. (67), А.М. (50), Ќ.Ќ. (53) и Ф.А. (63), сите од Тетово и А.Ш. (51) од Гостивар за „трговија со дете“ (член 418-г став 3) од Кривичен законик“, информира МВР.