Најголемата германска банка „Дојче банк“, во третиот квартал евидентираше рекордни загуби поради високите судски трошоци, како и отпис на вредноста на т.н. нематеријален имот и удел во една од кинеските банки, пишува „Њујорк тајмс“.
Во период од јули до септември, нето-загубата на „Дојче банк“ достигнал 6,01 милијарди евра во споредба со загубата од 94 милиони истиот период лани.
Директорот на банката, Џон Крајан, ваквите резултати ги нарекол „крајно разочарувачки“.
„Дојче банк“, исто така, соопшти дека ќе укине 9.000 работни места и ќе се повлече од десет земји од светот. Тоа е предвидено во рамките на програмата за скратување на трошоците.
Непосредно пред објавување на денешните резултати за работењето, „Дојче банк“ соопшти дека ќе ја стопира исплатата на дивидендата за оваа и за следната година, како и тоа дека планира да ги намали трошоците на помалку од 22 милијарди долари.