Михаел Георг Линк, директорот на ОДИХР, денеска го осуди синоќешниот напад на пратениците во Собранието и повика на итни мерки за мирно решавање на ситуацијата.
– Повикувам на итен политички дијалог во парламентот за да се обезбеди примена на ненасилни решенија во најкус можен рок – вели Линк.
Нагласувајќи ја виталната важност на Собранието како еден од темелите на демократијата, тој предупреди дека заплашувањето и физичкото насилство немаат место во еден демократски систем.
– Безбедното функционирање на парламентот е клучно за обезбедување конструктивна и разумна дебата меѓу избраните претставници – дебата што е суштински потребна за да се зачува плурализмот и да се реагира на поделбите во општеството – вели Линк.
Тој порача дека ОДИХР е подготвена да им помогне на сите членки на ОБСЕ со секаква помош што е нужна за поддршка на демократските процеси и зацврстување на заложбите на ОБСЕ за поддршка на демократијата и на човековите права.