Министерот за надворешни работи Никола Димитров утрово ќе има појадок со неговите колеги од Европската Унија и ќе ги информира европските министри за текот на реформите и ќе бара од нив да го „препознаат историскиот момент за Македонија и регионот“.
Неформалниот појадок, организиран од страна на Бугарија и Австрија, односно од сегашното и следното претседателство на ЕУ, ќе се одржи еден час пред почетокот на редовниот совет на ЕУ за надворешни работи.
За Македонија е од голема важност да добие временска рамка за почетокот на преговорите во текот на оваа година, бидејќи следната година е изборна во Европската Унија и политичките процеси ќе бидат во застој.
Димитров, кој по Њујорк веднаш отпатува за Брисел, вчера имаше тет-е-тет средба со високата претставничка за надворешни работи на ЕУ, Федерика Могерини.
Иако беше најавена, средбата меѓу Димитров и неговиот грчки колега, Никос Коѕиас во Брисел, како продолжение на њујоршката рунда преговори официјално се уште не е потврдена. Според агендата на грчкиот министер за надворешни, за тоа нема да има многу време со оглед на информацијата дека веднаш по министерскиот совет Коѕиас патува за Германија каде треба да оствари средба со германскиот претседател Франк Валтер Штајнмајер.