Германскиот парламент денеска го одобри третиот голем пакет помош за Грција. За договорот за помош на Грција гласале 454 пратеници, 113 биле против, а 18 биле воздржани.
За пакетот помош, покрај пратениците на Христијанско-демократската унија на канцеларката Ангела Меркел, гласале и нејзините коалициски партнери, Социјалдемократите и опозициската Партија на зелените.
Министерот за финансии, Волфганг Шојбле во пресрет на гласањето, ги повика пратениците да го поддржат пакетот за помош бидејќи тоа е во интерес и на Грција и на Европа.
– Секако, после искуството од минатата година и од изминатите месеци, нема гаранции дека ова ќе успее и нормално е да се има сомнежи. Но, имајќи предвид дека грчкиот парламент веќе ги помина поголемиот дел од мерките, ќе биде неодговорно да не се искористи можноста за нов стар на Грција – рече Шојбе во излагањето пред Бундестагот.
Новата тригодишна помош од 86 милијарди евра и е неопходна на Грција за да може на Европска централна банка да и плати рата од кредитот која доспева во четврток.