Има прогрес во подготовките за изборите, но има уште многу работа, оцени денеска портпаролката на Европската комисија, Маја Коцијанчич.
– Одблизу го следиме развојот на настаните во Македонија. Што се однесува на подготовките за изборите што треба да се одржат за два месеци, направен е прогрес, но има уште работа што треба да се заврши за да се обезбедат веродостојни извори и да бидат во согласност со стандардите – изјави Коцијанчич.
Таа истакна дека треба да продолжи спроведувањето на Договорот од Пржино, како и спроведувањето на итните реформи.
– Во интерес на државата, пред сè на нејзините граѓани, е да се реши политичката криза. Се надеваме дека политичките партии ќе останат посветени на оваа амбиција, на оваа цел и на тоа што беше договорено, особено на тоа што се однесуваше на изборите, како и на реформските приоритети кои се, пред сè, во интерес на државата и на нејзиниот народ – рече Коцијанчич.