Во рамките на одбележувањето на Европската недела на тестирање за ХИВ (22-29.11.2019), ХЕРА – Асоцијација за здравствена едукација и истражување, организира неколку настани, во рамките на кои и ќе се врши бесплатно тестирање на заинтересираните за заразеност со ХИВ.
Одбележувањето на Европската недела на тестирање за ХИВ почнува вечерва, со настанот „Минус или плус – се живее со секој статус“ во соработка со здружението ЗАЕДНО ПОСИЛНИ, од 19 часот во кафе бар „Котур“ во Скопје.
Настанот е од отворен карактер, а ќе се состои од проекција на неколку кратки видеа со лични приказни за животот со ХИВ и разговори околу нормализирање на разбирањето за ХИВ денес.
Бесплатните тестирања за ХИВ ќе се вршат секој работен ден почнувајќи од денеска до следниот петок, во Младинскиот центар на ХЕРА „Сакам да знам” на Водно, секој работен ден од 17 до 21 часот. За време на викендот бесплатните тестирања ќе се вршат од 11 до 15 часот.