Обвинителството во белгискиот град Шарлоа ја отфрли можноста за постоење траги од тероризам во убиството на припадникот на обезбедувањето на нуклеарната централа Тијанж, чија пропусница потоа е украдена.
Белгиската мрежа на нуклеарни централи и другите големи инфраструктури се соочени со закана од кибернетечки напади во следните пет години, потврди координаторот на ЕУ за борба против тероризам Жил де Кархове во интервју за „Либр Белжик“.
– Не би ме зачудило ако во следните пет години има обиди за напади преку интернет – рече Де Керхове.
Белгиските медиуми пред два дена објавија дека бриселските бомбаши-самоубијци Халид и Ибрахим ел Бакару планирале и напад на белгиската нуклеарна електрана, но го смениле планот откако е уапсен Салах Абдеслам, главниот осомничен за нападите во Париз.
Доказите до кои дошле белгиските власти покажуваат дека истата терористичка ќелија која стои зад минатогодишните нападите во Париз, во кои загинаа 130 лица, е одговорна за нападите на аеродромот и метро-станицата во Брисел, во кои загинаа 31 лица, а 270 се ранети.