Австрија денеска во осум часот почна да го применува ограничувањето за бројот на мигрантите кои дневно можат да влезат во земјата.
Министерката за внатрешни работи на Австрија, Јоана Микл-Лајтнер, претходно најави дека дневно од балканската рута ќе се прифаќаат само 80 барања за азил, а ќе се пропуштаат по 3.200 бегалци.
Еврокомесарот за миграција, Димитрис Аврамопулос, ѝ испрати писмо на австриската влада во кое укажува дека Виена ги прекршува законите на Унијата.
– Австрија спаѓа во најоптоварените земји-членки на ЕУ и ги достигна своите граници на издржливост – нагласи Микл-Лајтнер во соопштението и додаде дека мора да ги обезбедат сопствените граници сè додека не постои европско решение.
Таа истакна дека Австрија не може да совлада ист број бегалци како минатата година и дека воведувањето на дневните ограничувања е само еден чекор кон запирање на бранот бегалци.
– Важно ни е секоја земја долж балканската рута да дејствува рестриктивно на своите граници, а тој домино-ефект е поделотворен ако сите дејствуваат усогласено – рече Микл-Лајтнер, додавајќи дека подготовките за дневниот контигент се завршени и оти во дневната практика, квотата ќе биде распоредена на квоти за секој час.