Илјадници Бразилци излегоа на улиците во повеќе градови во земјата да побараат од конгресот да ја отповика претседателката Дилма Русеф поради корупцискиот скандал на нејзината влада и лошите економски резултати.
Протестите се одржаа во десетина градови, вклучувајќи го и главниот град Бразилија и упориштето на опозицијата Сао Паоло, но биле значително помалку масовни од демонстрациите одржани претходно во текот на годината, против Дилма Русеф и нејзината владејачка Работничка партија.
Единствена разлика овојпат е тоа што постапката за отповикување на претседателката веќе е покрената. Претседателот на долниот дом на парламентот, Едуардо Куна, голем соперник на Русеф, на почетокот од месецов поднесе петиција за нејзино отповикување.
Расправата привремено ја запре врховниот суд, кој разгледува неколку прашања во врска со формирање комисија за расправа.