Денеска во седиштето на партијата во Тетово, претседателот на Демократска унија за интеграција (ДУИ), Али Ахмети, ја пречека делегацијата на европратеници предводена од Џани Питела, претседател на групата на социјалистите и на демократите во Европскиот парламент, Кнут Фленкенштајн, потпретседател на групата на социјалистите и на демократите во Европскиот парламент, како и поранешниот известувач на Европскиот парламент за Македонија, европратеникот Ричард Ховит.
Тој ги информирал европратениците дека деновиве ги претставил ставовите на ДУИ пред лидерите на ВМРО-ДПМНЕ и на СДСМ околу итноста да се заклучи Договорот од 2 јуни, барајќи од нив да размислуваат за државата и за граѓаните, а не за партиите.
Како што соопштија од ДУИ, лидерот на партијата истакнал дека ДУИ го ревидирала својот пристап, и покрај фактот дека е конструктивен дел и придонесува за постигнување на решение и смета дека Договорот нема алтернатива.
– ДУИ постојано помага во решавањето на отворените прашања и е партнер на меѓународната заедница, но смета дека одговорноста треба да ја поделат и македонските партии. Спроведувањето на Договорот овозможува враќање на евроатланската агенда, која е апсолутен приоритет на граѓаните на земјата, особено на Албанците – рекол Ахмети.
Европратениците побараа строго спроведување на Договорот за продолжување на преговорите за членство во ЕУ.