Жителите од Гостивар и околните села со блокада на локалниот пат кој води до регионалната депонија „Русино“, го изразија револтот од како што рекоа, неодговорниот однос на полошките општини, кои го носат сметот на оваа локација.
Според учесниците на протестот, депонијата работи без никакви стандарди, а патната делница која води до „Русино“ е целосно уништена од камионите на комуналните претпријатија, кои го транспортираат сметот до регионалната депонија лоцирана на само неколку километри од Гостивар.
– Бараме општините од полошко кои го носат сметот до „Русино“ да ја уредат депонијата, затоа што тие ја користат. Сега таму комуналните претпријатија на диво го фрлаат сметот, така се загадува нашата околина. Треба да се направи современа фабрика во „Русино“ за депонирање и рециклирање на сметот. И патот кон „Русино“ е целосно уништен. Камионите од комуналните претпријатија го уништија патот, а не ставија ниту грам асфалт – вели еден учесник на протестот.
Од Општина Гостивар велат дека за уредување на „Русино“ надлежен е Центарот за полошки плански регион, а во меѓувреме работат на алтернативен пат, кој ќе се користи за носење на сметот.
Од кабинетот на градоначалничката на Тетово, Теута Арифи, која е претседателка на Центарот за полошки плански регион, во неколку наврати соопштија дека засега нема никакви активности околу уредување на регионалната депонија „Русино“.