Градоначалниците на Тирана, Тетово, Приштина, Прешево и на Улцињ вчера во албанскиот главен град формираа Унија на албански општини во регионот.
Како што јавува албанската телевизија „Топ ченел“ од Тирана, првпат е формирана унија на главни општини во регионот со кои раководат Албанци, а асоцијацијата има цел да изгради механизми потребни за меѓусебна соработка.
Градоначалниците на пет градови од Албанија, Македонија, Србија, Косово и од Црна Гора пред неколку недели го договорија формирањето на Унијата на албански општини во регионот, а вчера во Тирана потпишале платформа за соработка во областа на урбанизмот, животната средина, културата, инвестициите и на иновациите.
– Набргу ќе направиме стабилна мрежа, каде ќе учиме едни од други – рече градоначалникот на Тирана, Ерјон Велијај.
На негова покана, градоначалниците на Тетово, Приштина, Прешево и на Улцињ денеска присуствуваат на одбележувањето на Денот на независноста на Албанија.
Независноста на Албанија е прогласена на денешен ден, 28 ноември 1912 година, на Големото народно собрание во Валона, а потврдена е една година подоцна со Лондонскиот мировен договор, со кој е ставен крај на Втората балканска војна.
Албанскиот национален празник е познат и како Ден на знамето. Црвеното знаме со двоглавиот орел првпат го употребил Скендер-бег во 1443 година.