„Викиликс“ објави извештај во кој се наведува дека менталното здравје на основачот на страницата, Џулијан Асанж, ќе биде загрозено ако остане во амбасадата на Еквадор во Лондон.
Извештајот е објавен пред судското сослушување во Шведска за тоа дали апелацискиот суд ќе го поддржи налогот за неговото апсење по обвинувањето за силување во 2010 година.
„Менталното здравје на господинот Асанж најверојатно ќе се влоши со текот на времето ако остане во сегашната ситуација која треба да се реши што е можно побргу“, се наведува во лекарскиот извештај што го објави „Викиликс“ на „Твитер“.
Извештајот од 27 страници го направил неименуван експерт за траума и за психосоцијална состојба, а составен е на основа на пет разговори водени со Асанж до јуни минатата година.