Вечерва, во рамките на фестивалот „Охридско лето“, во Антички театар, концерт ќе одржи еден од нашите најдобри современи пијанисти и композитори, Дуке Бојаџиев, со својот фантастичен проект „Сон, верба, љубов“.
Бојаџиев ќе настапи со својот ансамбл од специјални гости: Исмаил Лумановски – кларинет, Тања Царовска – вокал, Мартин Ѓаконовски – контрабас, Мартина Блажеска – вокал, Костас Анастасиадис – перкусии, Владимир Крстев – стринг квартет.
„Сон, верба, љубов“ во себе ја инкорпорира музиката што Дуке Бојаџиев ја создаде за филмовите „До балчак“, „Сенки“ и „Војната заврши“, потоа композиции од неговиот албум „Љубовта е патот“, како и нови, досега неизведени творби. Вклучувајќи ги и аранжманите и изведбата, проектот може да се опише како вкусен спој на филмска, класична и на изворна музика, и во него силно се чувствува поднебјето на авторот, односно духот на македонската традиција.
Покрај македонскиот традиционален звук, музиката на Бојаџиев опфаќа фолклорни елементи и од турската, ромската и од албанската музика, кои авторот ги соединува во една автентична целина со современ пристап и со тоа влијае на фузионирање на културното богатство на сите народности што живеат во Македонија.
– Проектот „Сон, верба и љубов“ носи една порака, која во коренот е македонска и која јас и другите уметници ја пренесуваме низ светот. Музика која ќе имаме можност да ја презентираме тука во Охрид и на огромно задоволство, сето тоа да го крунисаме со концерт со Камерниот оркестар на Македонската филхармонија, во „Карнеги хол“ во Њујорк на 8 октомври – вели Бојаџиев.