Светската програма за храна (ВФТ) денеска соопшти дека помошта за сирискиот град Мадаја, кој е под опсада, треба да пристигне утре наутро, јавува „Би-Би-Си“.
Во конвојот, според ВФТ, ќе има доволно храна и лекови за еден месец за околу 40.000 луѓе во Мадаја, град во близина на границата со Либан, кој е под контрола на бунтовниците.
Страдањето на жителите на Мадаја го привлече вниманието на светската јавност по фотографиите со тешко прегладнети луѓе. Тамошните жители умираат од глад, а според некои извештаи, некои од нив ги јадат домашните миленици и трева за да преживеат.
Како што пренесува „Би-Би-Си“, околу 4,5 милиони луѓе во Сирија живеат на тешко достапни подрачја, вклучително и околу 400.000 лица во 15 опколени локации кои немаат пристап до никаква хуманитарна помош.
В понеделник, помош треба да добијат уште два града, Кефраја и Фоја, на северот на Сирија, кои се под контрола на владините сили. Се проценува дека станува збор за околу 30.000 луѓе.
Повеќе од 250.000 лица ги загубија своите животи, а повеќе од 11 милиони Сиријци беа принудени да ги напуштат своите домови по избувнувањето на судирите меѓу владините сили, верни на претседателот Башар ал-Асад и бунтовниците, пред пет години, како и поради нападите на терористичката група Исламска држава.