По разорните поплави во делови на Босна и Херцеговина, во кои загинаа најмалку 18 лица, општина Јабланица прогласи тридневна жалост, јавува босанската телевизија БХРТ. Со одлука на локалните власти, денови на жалост се денеска, утре и вторник. Најмногу загинале во Јабланица, 13, двајца во областа Коњиќ и три во Фојница. Покрај човечки жртви, поплавите предизвикаа и огромни материјални штети.
Спасувачите и денеска се на терен и трагаат по исчезнати лица. Беше побарана и меѓународна помош, а одговорија десет земји од регионот и Европската Унија. Во обид да му се помогнат на настраданото население, спасувачки тимови од Босна и Херцеговина, Хрватска и Србија се вклучени во операциите за спасување, а најтешка е ситуацијата во Јабланица, Фојница, Крешево и Кисељак. Само на подрачјето на Јабланица и Коњиќ се трага по 10 до 15 лица.
Претходно, Босна и Херцеговина го активираше Механизмот за цивилна заштита на ЕУ (EUCPM) и тимови за одговор ќе пристигнат на местото на настанот, потврди шефот на Делегацијата на ЕУ во БиХ, Луиџи Сорека. Во катастрофалните поплави што ја зафатија земјата настрадаа најмалку 18 лица, а стотици останаа без покрив над главата. Дел од нив се сместуват во локални хотели и во Домот за стари лица во Јабланица, а мнозинството и кај пријатели и роднини во станови и семејни куќи во Јабланица и Коњица. Штабот на ЦЗ на ХНК вчера обезбеди 80 кревети во спортската сала во Јабланица, во случај да има потреба од сместување на настраданите, а тие кревети сега спасувачите ги користат за ноќевање и одмор. Од вчера е воспоставена и патната комуникација меѓу Мостар и Јабланица, но исклучиво за возила на спасувачките служби и за итни случаи.