Со 61 глас „ЗА“, Собранието попладнево ја избра Добрила Кацарска за нов уставен судија. Кацарска е избрана за судија во Уставниот суд по предлог на Судскиот совет. Нејзиниот мандат ќе трае 9 години, а таа доаѓа на местото на досегашниот уставен судија Владимир Стојановски, чиј мандат му истече во април годинава. Со изборот на Кацарска, се комплетира составот на Уставниот суд.
Опозициската партија ВМРО-ДПМНЕ жестоко се спротивстави на изборот на Добрила Кацарска за уставен суд и на денешната собраниска седница не присуствуваше на гласањето. Расправата пред изборот на новата уставна судијка помина во мошне бучна атмосфера, поради противењата на опозицијата за нејзин избор.
Добрила Кацарска е судијка со 30-годишно искуство, која што судела предмети како од кривичната област, така и предмети од граѓанската област. На позицијата уставен судија доаѓа од Основниот кривичен суд во Скопје, каде досега беше судијка за организиран криминал.