Во рамки на првото продолжениe од 21. седница, Собранието на Република Македонија денеска го поддржа во прво читање предлог-законот за претворање на побарувањата на Република Македонија врз основа на платени обврски кон странски кредитори во траен влог во ЈП МЖ „Инфраструктура“ – Скопје и ја заврши расправата за предлог-законот за изменување и дополнување на Законот за придонеси од задолжително социјално осигурување, за кој гласањето ќе биде по редовната пауза.
Во образложението на предлог-законот за претворање на побарувањата на Република Македонија врз основа на платени обврски кон странски кредитори во траен влог во ЈП МЖ „Инфраструктура“ – Скопје, заменик-министерот за финансии, Ардиан Џеладини, рече дека основно решение што се предлага со законот е претворање на побарувањата на Република Македонија врз основа на платени кредити од странство од страна на државата во период 2013-2014 година, во траен влог во ЈП МЖ „Инфраструктура“ – Скопје.
Во образложението на измените и дополнувањата на Законот за придонеси од задолжително социјално осигурување, заменик-министерот за финансии Џеладини рече дека целта е уредување на стапката и основицата за пресметување на придонесот за задолжително здравствено осигурување на иселениците-државјани на Република Македонија кои примаат пензија или инвалиднина од странски носител на осигурување.