Во скопската Зоолошка градина викендов се одржа настан за најмладите организиран од Државната комисија за спречување на корупцијата (ДКСК), со цел уште од мали нозе да се развива свесноста за последиците од корупцијата и судирот на интересите, како и за заштита на укажувачите.
Во рамките на настанот „Викенд на врапчето“ дечињата цртаа птици – симбол на укажувачите, а воедно се информираа заедно со своите родители за значењето на темата интегритет и важноста од заштита на укажувачите за создавање на просперитетно општество.
Содржините беа прилагодени на возраста на дечињата, за нивно полесно разбирање и усвојување, преку концептот на игра и забава. Актерката Ана Левајковиќ од Театарот за деца и младинци ги анимираше дечињата и преку разговор и игри им го доближи концептот на укажувачи и им ја пренесе пораката за важноста да се реагира и укаже на сѐ што е неправилно и штетно.
За секој цртеж, дечињата добиваа карта за влез во Бејби зоолошката градина и пакет за хранење на животните.
Настанот „Викенд на врапчето“ е дел од кампањата за заштита на укажувачите на ДКСК, како дел од ИПА II проектот на ЕУ „Промовирање на транспарентноста и одговорноста на јавната администрација во Северна Македонија“.