„Институциите на системот не смеат да ги попречуваат народните избраници да го побараат мандатот за формирање влада. 67 пратеници, кои претставуваат околу 700.000 граѓани, очекуваат Собранието и Ѓорге Иванов да одговорат на своите уставни должности и да го овозможат доделувањето на мандатот“, велат од СДСМ.
„Граѓаните во Македонија очекуваат стабилизација и напредок. И меѓународната заедница испрати јасна порака дека во демократијата секој треба да го признае парламентарното мнозинство. Никола Груевски и раководството на ВМРО-ДПМНЕ мора да се воздржат од активности што поттикнуваат меѓуетнички тензии, говор на омраза и ги вознемируваат граѓаните со лажни вести“, велат СДСМ преку партиско соопштение.
Од СДСМ очекуваат утре и во деновите што престојат, сериозно и одговорно државничко однесување од страна на институциите, кои, како што велат од партијата, мора да ја почитуваат волјата на мнозинството граѓани и да овозможат избор на нов претседател и составување на новата влада.