Обидот по секоја цена да се истурка процедурата на амaндманските измени на Уставот во Собранието на Република Македонија ќе биде само уште еден доказ дека финансиските интереси на оваа власт ѝ се поважни од сè друго, вклучувајќи ја и евроатланската перспектива, велат од СДСМ.
– Амандманите на Уставот, онака како што се утврдени во Собранието, се проблематични и од аспект на нивниот легитимитет и од аспект на нивната формулација, а некои од нив и од аспект на целта заради којашто се туркаат. Венецијанската комисија и Европската комисија веќе укажаа дека уставни измени треба да се носат со најширок можен консензус, како политички, така и општествен. Туркањето уставни амандмани во ситуација на политичка и државна криза, во ситуација кога опозицијата е надвор од Собранието, е уште еден доказ за дрскоста, ароганцијата и за исклучивоста на власта, како и за отсуството на чувство за потребата од дијалог – вели Рената Дескоска, претседателка на Комисијата за правда на СДСМ.
Таа вели дека со насилното туркање на уставните измени во ситуација кога опозцијата не е во Собранието, а државата е во политичка и државна криза, ВМРО-ДПМНЕ и ДУИ уште еднаш ќе покажат дека не ги научија историските поуки.
– На власта ѝ порачуваме: излезете од ќор-сокакот во којшто влеговте! Не пазарете се со работи што не се за пазарење! Не спроведувајте постапки што внесуваат дополнителен раздор! Уставот во секоја земја треба да е највисок акт што обединува, а не што разединува – вели Дескоска.