Русија започна засилени воздушни напади со беспилотни летала врз Кијив и други украински градови додека Москва се подготвува за прославата на Денот на победата, со кој се прославува поразот на Германија во Втората светската војна во 1945 година, пренесе Ројтерс.
Дури 16 ракетни напади биле насочени кон градовите Харкив, Керсон, Миколаив и Одеса, додека 61 воздушен и 52 ракетни напади биле насочени врз украинските позиции и населени области, соопшти Генералштабот на вооружените сили на Украина во утринскиот извештај.
Украинската противвоздушна одбрана соопшти дека ги уништи сите 35 беспилотни летала Шахид од иранско производство што Русија ги лансираше.
Градоначалникот на Кијив изјави дека најмалку пет лица се ранети во главниот град поради оштетување на складиште за гориво, автомобили, згради и инфраструктура.
„За жал, има загинати и ранети цивили, оштетени се високи згради, приватни домови и друга цивилна инфраструктура“, соопшти војската.
Во црноморскиот град Одеса е запален магацин за храна.
Новите напади доаѓаат додека Москва се подготвува за парадата на Денот на победата во вторник, клучен настан за претседателот Владимир Путин, кој го евоцира духот на советскиот триумф над нацистичка Германија, обвинувајќи ја Украина дека е под контрола на нов вид на фашизам.
Украина и нејзините сојузници велат дека обвинението е неоснован изговор за неиспровоцираната инвазија на Русија во февруари 2022 година, што резултираше со најголемиот конфликт во Европа од Втората светска војна, при што загинаа илјадници а милиони беа присилени да ја напуштат земјата.
„Мораме секогаш да бидеме подготвени на непријателско предавство и одбрана“, рече заменик-министерката за одбрана на Украина Хана Маљар во објава на апликацијата за пораки Телеграм.
Русија го засили гранатирањето на Бахмут, надевајќи се дека ќе го преземе до вторник, изјави главниот украински генерал кој ја предводи одбраната на опколениот град, откако руската платеничка група Вагнер се чини дека ги отфрли плановите да се повлече оттаму.