Денешната промоција на печатеното издание на „Проглас“ од Константин Философ – Св. Кирил и отворањето на изложбата „По трагите на Светите Кирил и Методиј“, се дел од содржините за одбележување на празникот 24 мај – Ден на сесловенските просветители Светите Кирил и Методиј, организирани заедно со Словачка.
Во своето обраќање на промоцијата, премиерот Зоран Заев рече дека мисијата на Светите Кирил и Методиј за обединување на словенските со другите народи на Европа, пред нешто повеќе од 1150 години, покрај христијанизацијата, имала и извонредно и единствено историско-културолошко и епохално просветителско значење.
„И овој настан во чест на Светите Кирил и Методиј, обединува. Овој пат ги обедини Република Северна Македонија и Република Словачка преку заедничкото издание на „Прогласот“ на Константин Философ – Свети Кирил“, рече Заев. Тој додаде дека, ова библиофилско издание за прв пат беше објавено во Словачка по повод 1150 годишнината од Великоморавската мисија на сесловенските просветители, а сега доживеа и второ, дополнето издание, на старословенски, словачки и македонски јазик.
Делото е објавено повторно од Словачката народна библиотека, во соработка со издавачот, Друштвото на писатели на Словачка и со финансиска поддршка на нашата Влада. Посебна заслуга има Стојан Лекоски, наш сограѓанин кој повеќе години живее и работи во Словачка и кој е составувач и преведувач на делото.
Денешниот настан во пресрет на 24 мај – Денот на сесловенските просветители, Светите Кирил и Методиј е збогатен и со изложбата „По трагите на Светите Кирил и Методиј“, на која низ фотографии и илустрации се прикажани нивниот живот и дело и нивните мисии во Европа. Тие мисии, покрај ширењето на словото Христово, описменувањето и просветлувањето, биле и теолошката апологија на старословенскиот јазик и неговото користење во божјите служби, кои дотогаш во Европа се вршеле само на три јазика, латински, грчки и германски.
По повод промоцијата на библиофилското издание на Прогласот од Константин филозоф – Св. Кирил, на старословенски, словачки и македонски јазик, а во пресрет на одбележувањето на делото на Светите Кирил и Методиј, денеска претседателот Стево Пендаровски ги прими Архиепископот Кирил Васил, администратор на епархијата во Кошице, Хенрик Маркуш, амбасадорот на Словачка во Северна Македонија, Франтишек Рабек, претседател на Словачката бискупска конференција и Стојан Лекоски.
Се разговараше за важноста од негувањето на културно-духовната врска меѓу Северна Македонија и Словачка, како предуслов за пријателските односи и градењето на заемна почит и разбирање. Пендаровски изрази задоволство од силните политички, историски и културни врски меѓу двете земји и очекување за натамошно динамизирање на соработката меѓу двете држави во областите од заемен интерес, соопштија од претседателскиот кабинет.