Превозниците веќе доставиле барања за средба со претставници на новата влада, односно со премиерот, министерот за транспорт и врски и министерот за финансии, вели за „Мета“, Билјана Муратовска од Здружението на превозници „Макам-транс“.
Таа вели дека од нив ќе побараат што е можно побрзо да се завршат измените во Законот за работно време, задолжителните одмори на мобилните работници и возачите во патниот сообраќај и уредите за запишување во патиниот сообраќај, а се поврзани со повелбата за квалитет.
„Секоја држава од 1 јануари 2018 година треба да ја спроведе повелбата за квалитет која подразбира исполнување на одредени критериуми за добивање на транспортните ЦЕМ дозволите кои се важни за вршење на превоз. Дел од овие критериуми се однесуваат на работното време на возачите, обновување на лиценците, задолжително осигурување, завршување на некои проекти. Дел од овие работи до сега требаше да бидат завршени“, изјави Муратовска.
На разговорите со претставниците на надлежните министерства, според Муратовска, ќе стане збор и за проширување на граничните премини Табановце и Ќафасан.