Претседателот на државата, Ѓорге Иванов, денеска ќе го додели признанието „Повелба на Република Македонија“ на пет македонски организации од дијаспората во Република Франција, Кралството Шведска, Австралија и во Канада.
Како што соопштуваат од кабинетот на претседателот, признанието ќе биде доделено на: Француско-македонската асоцијација „Блаже Конески“ од Мант ла Жоли, во Република Франција; Културното и спортско друштво „Песпа – Бирлик“ од Малме, Шведска; Охридското социјално друштво „Свети Наум Охридски“ од Мелбурн, Австралија; Австралиско-македонскиот театар од Сиднеј, Австралија и Ансамблот „Македонка“ од Торонто, Канада.
Признанието „Повелба на Република Македонија“ се доделува за особени заслуги и за достигнувања на организациите во насока на зачувување и на афирмирање на македонските историски, културни и духовни традиции и вредности, како и за придонес кон унапредување на пријателските односи и соработката со повеќе држави во светот.