И покрај тоа што беше закажан за периодот од 1 до 30 април 2020 година, пописот на населението ќе се одложи за една година. Од Државниот завод за статистика (ДЗС) денеска и официјално побараа периодот на спроведување на пописот да се пролонгира за април 2021 година, а Законот за попис на население, домаќинства и станови да биде донесен пред формирање на техничката влада.
„Согласно воспоставената меѓународна пракса и искуство, пописните и изборните активности не можат да се одвиваат паралелно“, се наведува во соопштението на ДЗС.
Статистика ќе го достави предлогот за пролонгирање на пописот до Министерството за правда, кое е официјален предлагач на Законот за попис на население, домаќинства и станови.
Од ДЗС потенцираат дека се подготвени за разгледување на можностите за усогласување на сите отворени забелешки поврзани со пописот со сите релевантни чинители во државата.