Во Собранието на Република Македонија денеска почнува постапката за донесување на буџетот за 2018 година. Предложениот буџет ќе биде единствената точка на денешната седница на матичната Комисија за финансирање и буџет, која почнува во 11 часот.
Според деловникот, расправата во матичната комисија трае 10 работни денови. Поднесени се 279 амандмани, од кои 204 од ВМРО-ДПМНЕ, а 75 од Беса.
Вкупните приходи Владата предвидува да изнесуваат 193.512 милиони денари, односно 3,1 милијарда евра, додека расходите се планирани на 211.745 милиони денари, односно 3,4 милијарди евра.
Проектиран е буџетски дефицит од 2,7 отсто од БДП. За да биде пониско задолжувањето, се зголемува акцизата на нафтата за три денари од 1 јануари 2018 година.
Вкупните планирани приходи за наредната година се поголеми за 4,7 отсто во однос на годинава.