Густата магла и попладнево беше причина за откажување на дел од летови на аеродромот „Александар Велики“. Според податоците од интернет страницата на концесионерот на аеродромот ТАВ Македонија, денеска не слетаа авионите кои летаа од Истанбул, Цирих, Братислава и Малме, а не скопскиот аеродром не полетаа ниту авионите за Белград, Истанбул, Цирих и Малме.
Откажан е и полноќниот лет од Виена, како и авионскиот лет од Скопје за Виена, кој според планот требаше да биде реализиран утре наутро.
Од АМСМ јавуваат дека сообраќајот по државните патишта се одвива со намалена видливост од маглата од 50 до 100 метри на патниот правец Скопје – Миладиновци, додека видливоста на патниот правец Скопје-Катланово е од 100 до 150 метри.
Сообраќајот на државните патишта се одвива во зимски услови, по наместа влажни коловози.
АМСМ препорачува внимателно возење, прилагодена брзина на движење и почитување на поставената сообраќајна сигнализација.