Осум австриски компании остварија средба со 35 македонски фирми за соработка во областа на електро-металската индустрија, прехранбената, производство на медицинска опрема и на расветни тела.
– За македонските компании е од големо значење да соработуваат со компании од силните економии како што е Австрија. Нашите напори се насочени кон секторска поврзаност на македонските и на австриските компании. Лани остваривме пет средби и имаше конкретни договори – изјави Наташа Димеска-Стојаноска од Стопанска комора.
Анализите покажуваат дека соработката може да се подобри во земјоделско-прехранбениот сектор, животната средина, обновливи извори, автомобилска и текстилна индустрија, туризам, инфраструктура. Од 10 до 12 јуни во Виена ќе се одржува деловен состанок, што ќе се однесува на градење „паметни градови“ и е можност за пријавување на градежните компании.
– Деловната клима од компаниите е оценета како релативно стабилна, а постојаните инвеститори преземаат мерки за зголемување на своите дејности – изјави раководителот на трговското одделение на Амбасада на Австрија во Македонија, Герхард Шлатл.
Тој не сакаше да ги коментира актуелните политички случувања и нивнито влијание врз економијата, но подвлече дека важни за развојот се предвидливи правни рамки и опкружување.
Австрија е втор најголем инвеститор во Македонија со вкупни инвестиции од 74 милиони долари.