Министерот за внатрешни работи, Оливер Спасовски, денеска се сретна со Насер Селмани и со Столе Наумов, претставници на Здружението на новинари на Македонија (ЗНМ).
На средбата се разговарало за нападите врз новинари и врз медиумите што се случија во изминатиот период.
Како што пишува во соопштението на МВР, Спасовски и претставниците на ЗНМ се согласиле дека нападите врз новинари претставуваат директен напад врз основното право на граѓаните да бидат информирани и тие не смеат да бидат толерирани.
Спасовски истакнал дека во интерес на почитување на демократските принципи, ќе бидат преземени сериозни мерки за итно расветлување на овие инциденти.
Исто така, министерот изразил подготвеност на Министерството за внатрешни работи за понатамошна соработка со ЗНМ, за да се обезбедат достоинствени услови за вршење на новинарската професија.