Колажна вечер, од музички концерт, драмска претстава и од ликовна изложба, реализираше синоќа фестивалот „Охридско лето“. И трите настани беа исклучително добро посетени, со полни гледалишта.
На Малата сцена во центарот од култура „Григор Прличев“, актерите од Народниот театар на Центарот, ја прикажаа фестивалската премиера на претставата „Стари времиња“ од Харолд Пинтер, во режија на Нела Витошевиќ.
Во преполнетата „Св.Софија“, женскиот камерен хор „Св. Злата Мегленска“ ја воодушеви публиката со хорски изведби на духовна музика, раководен од Летка Димовска-Полизова, основач и диригент.
Во Големиот изложбен салон на Центарот за култура „Григор Прличев“, како дел од програмата на „Охридско лето“, беше отворена изложбата „Колажна приказна“ на македонската сликарка и алпинистка Илина Арсова.