Убавото време, со температура невообичаена за овој период од годината, до 15. Целзиусов степен, измами денеска многумина охриѓани на пријатна крајезерска прошетка. Живнаа и терасите од рестораните и кафулињата, што е само дополнителна провокација за новогодишните гости, кои планираат овде да го минат празничниот викенд.
На убавините што ги создава мирната езерска шир, со мноштвото галеби и со групата прекрасни лебеди, се насладуваа и мал број гости од земјата и од светот.
Последните дождови малку ја поправија и хидролошката слика. Нивото на водата во Охридско Езеро, испразнето во летните месеци, во моментов е на само неколку сантиметри над нултата позиција.