Министерот за економија Беким Незири e против ограничување на користењето стари возила кои не ги исполнуваат еколошките стандарди или забрана за нивно регистирање, и очекува дека во наредните неколку години нема да се воведува оваа мерка.
– Како ресорен министер, дадов негативно мислење за ова барање и реков дека ќе направам детална анализа. Ценам дека таквата мерка ќе има големи негативни ефекти врз економијата, а со неа ќе бидат засегнати и граѓаните. Се работи за голема бројка од 100.000 до 150.000 возила и мислам дека ќе претставува радикална мерка ограничувањето на нивното движење или, пак, оневозможувањето да се регистрираат. Сметам дека такво нешто нема да се случи во наредниве неколку години – рече министерот Незири, одговарајќи прашање на денешната прес-конференција во Министерството за економија, пренесува „А1 он“
Незири истакна дека за две недели Министерството треба да ја информира Владата за позитивните и за негативните ефекти од воведувањето таква мерка.
– Според податоците кои ги добивам од службите, јас, како министер, но и Министерството за економија, нема да поддржи ваква мерка. Мислам дека и Владата ќе има слух и оти ќе ја прифати анализата што ќе ја направиме – нагласи Незири.
Комитетот за заштита на животната средина неодамна на седница на Владата побара да се разгледа можноста да се оневозможи регистрацијата на старите возила, за почеток со стандард „еуро“, а подоцна и со „еуро 1“, или да биде редуцирано нивното движење во Скопје поради нивното негативно влијание на воздухот во градот.