Наместо првично планираните 75,76 милиони евра, државата се задолжи 81 милион евра кај домашните кредитори.
За ова поголемо задолжување реагираше и дополнителниот заменик министер за финансии, Кире Наумов.
– Заклучно со денешната аукција, нето-долгот од почетокот на годината е 60 милиони евра. Министерот Ставрески треба да им објасни на граѓаните која е основата за овие задолжувања.
Дали овие средства планира да ги „истури“ во предизборниот период или е свесен за реалната економска состојба и за погрешните економски политики на Владата во изминатиот период? Дали ваквите задолжувања се последица на општата намалена економска активност и на драстичното намалување на редовните приливи во буџетот? – се вели во реакцијата на Наумов.
Според соопштението од кабинетот на Наумов, и Народната банка во последниот извештај за макроекономските показатели констатирала потфрлање во приливите од ДДВ, данокот со најголемо учество на приходната страна.
– Во 2015 година, и според Народна банка приливите од данок на додана вредност (ДДВ) се пониски за 6,3 отсто од проектираните и, што е уште поалармантно, во апсолутен износ приливите од ДДВ во 2015 година се пониски од износот собран во 2014 година – се вели во соопштението.