Претседателот на управниот одбор и извршен директор на „УНИ-банка“, Коста Митровски, е избран за нов претседател на Здружението на банкарството, информираат од Стопанска комора на Македонија.
Поради оставката на Ѓорѓи Јанчевски, поднесена заради неговото пензионирање од функцијата претседател на управниот одбор на „НЛБ Тутунска банка“, Здружението на банкарството одржа седница на која го избра новиот претседател.
Членови на Здружението се финансиските организации, сите банки, друштва за работа со хартии од вредност, лизинг-компании, штедилници, финансиски друштва, друштва за управување со инвестициски фондови.
Здружението има повеќе групации и комисии според секторите кои согласно својата проблематика и дејност постојано се среќаваат и соработуваат за донесување заеднички прифатливи решенија.
Здружението на банкарството при Стопанската комора на Македонија од 1 јули 2011 година стана придружен член на Европската банкарска федерација (www.ebf-fbe.eu) со седиште во Брисел.