Сонцето и топлиот ветер од јужен правец донесоа високи вредности на дневната температура низ цела Македонија, која во Скопје достигна и до 24 Целзиусови степени, невообичаено за средината на февруари. Од Управата за хидрометеоролошки работи велат дека ова се должи на повеќедневен период на јужно струење, кое донесе топол воздух од Медитеранот.
– Во текот на денешниот ден дува јужен ветер, кој во јужните делови од земјава е засилен, а во околината на Штип достигнува и брзина до 90 километри на час. Во текот на попладневните часови, ветерот е позасилен и во Скопската Котлина. Ветерот ќе стивнува во текот на ноќта, но утре повторно ќе преовладува повремен до засилен ветер од јужен правец. Ова се должи на повеќедневен период на јужно или западно струење, кое ќе продолжи и во текот на следните денови. Ова струење донесе топол воздух од Медитеранот. Денеска во повеќе градови беше надмината дневната максимална температура. Во Скопје беа измерени 24 Целзиусови степени. Вакво време ќе потрае до четврток, кога се очекува влажен бран и врнежи од дожд, кои ќе предизвикаат намалување на температурата – вели Борис Секирарски, дежурен синоптичар од УХМР.