На 2 ноември, Глобална мрежа за одбрана и за промовирање на слободата на изразувањето (ИФЕКС) ќе го одбележи Меѓународниот ден за ставање крај на неказнивоста за злосторства против новинари, воведен со Резолуцијата на ООН од 2013 година.
Во моментов, девет од секои 10 случаи на убиства на новинари во светот се со статус нерешени и поминуваат неказнето.
Оваа година, ИФЕКС ја спроведува кампањата „Не за неказнивоста“, која ги одразува тековните напори да се зголеми политичката волја на државите да ја прекинат неказнивоста, и тоа не само за злосторствата против новинарите, туку и против уметниците, активистите, блогерите и другите што го применуваат своето право на говор.
Фондацијата „Метаморфозис“ од Скопје е првата членка на една од најголемите мрежи за слобода на изразување. Оваа акциска мрежа има 88 членки во 60 земји, при што најголем дел од нив се во земјите во развој.