Една недела пред почетокот на Канскиот филмски фестивал, ограбена е луксузната продавница „Картие“ во Кан, а однесен е накит и часовници во вредност од 17,5 милиони евра, соопштија извори блиски до полициската истрага.
Еден од ограбувачите носел маска на старица и имал пиштол, а кога упаднал во продавницата, им ја отворил вратата на двајцата соучесници, додека четвртиот крадец стражарел пред влезот на продавницата.
Во моментот на кражбата, во продавницата имало двајца продавачи и купувач.
Крадците побегнале со украден автомобил „мерцедес“, кој подоцна е пронајден во резидентниот дел на градот.
Француската полиција се обидува со помош на камерите од продавницата да ги идентификува крадците.