Министерот за здравство Венко Филипче при денешната посета на Бугарија во врска со донацијата на вакцини против ковид-19, информираше за состојбата со ковид-19 во земјава, слободните капацитети во јавно-здравствените установи и тестирањата. Тој рече дека, според извештајот на Институтот за јавно здравје, и оваа недела продолжува падот на сите бројки и индикатори и упати апел за натамошно почитување на мерките заради спречување на ширењето на ковид-19.
„Пред нас е многу убав период околу новогодишните празници, меѓутоа имаме многу тешка година зад нас и искрено верувам дека следната, ќе биде многу подобра. Апелирам во вакви услови, кога ситуација со епидемијата сериозно спласнува и се стабилизира, да не направиме ништо, истата сега се влоши. Апелирам да се празнува одговорно, во кругот на семејството, без групирање, со почитување на јасно пропишани протоколи и мерки. Се покажа дека сите досегашни мерки беа добро димензионирани и го дадоа резултатот, како што се очекуваше. Апелирам во следните две до три недели сите да бидеме крајно внимателни. Има некои позитивни придвижувања, ќе видиме дали е тоа почеток на крајот на епидемијата и затоа не смееме да ризикуваме уште еден силен бран“, истакна Филипче.
„Имаме намалување за 16,9 отсто на новозаболени во последните 7 дена, процентот на позитивни од тестирани лица бележи пад за цели 5 отсто, колку што бележи пад и процентот на починати лица. Се намалува бројот на пациенти кои се хоспитализираат во болниците и во скопските болници и клиники, како и во болниците низ државата. Во првата недела од декември имало 890 хоспитализирани пациенти, а денеска бројката е 629“, потенцираше Филипче, додавајќи дека во Скопје, Прилеп, Охрид Куманово и Струмица денес бројката на пациенти во болниците е значително помала во однос на почетокот на декември.
Во однос на тестирањата, тој посочи дека има сѐ повеќе слободни термини и дека притисокот се намалува.
„Во втората и во третата недела од декември намален е бројот на тестирања, како во државните така и во приватните лаборатории. Ако во целокупниот изминат период просекот на исполнување на термините беше истиот ден кога тие ќе се објавеа, сега и во текот на истиот ден има слободни термини. Во анализата за втората и за третата недела од декември државните лаборатории спроведуваат за приближно 100 отсто повеќе тестови од приватните лаборатории“, рече Филипче.
Инаку, утрово министерот Филипче беше во посета на Република Бугарија каде присуствуваше на владината седница на покана на премиерот Бојко Борисов и министерот за здравство Костадин Ангелов. При посетата тој рече дека интензивно се разговара во изминатите неколку недели и дека има добра вести, а тоа е дека Бугарија како донација ќе издвои слободно количество на вакцини што ќе ги добива преку сите форми на договори што ги има со компаниите.
„Изразив голема благодарност и истакнавме заеднички став, дека оваа криза ја поттикна и солидарноста и покажа и докажа дека само заеднички можеме да ги решаваме проблемите и да ги надминеме сите предизвици. Покрај Бугарија, која на овој начин даде поддршка, таква најава имаме и од Грција и од Полска“, информираше Филипче.