Поранешниот лидер на Независната партија на Обединетото Кралство (УКИП), Најџел Фараж, ја обвини Европската Унија дека ја третира Британија како свој заложник и оти се однесува како мафија поради барањата што ѝ ги поставува на земјата во процесот на преговарање за излегување од блокот.
– Се однесувате како мафија. Мислите дека сме заложници. Не сме. Ние сме слободни да заминеме – рече Фараж додека пратениците во Европскиот парламент се подготвуваа да гласат за „црвените линии“ кои не сакаат да ги преминат во преговорите околу Брексит, што предизвика потсмев и негодување меѓу другите пратеници.
Неговиот говор го прекина претседателот на Европскиот парламент, Антонио Тијани, оценувајќи дека е „неприфатливо“ Фараж да го споредува парламентот со мафија.
Претседателот на Европската комисија, Жан-Клод Јункер, претходно предложи Британија да ја „плати сметката за разводот“ од ЕУ во износ од 50 милијарди фунти.