Европската комисија се огласи по затворањето на новинарот Томислав Кежаровски, нагласувајќи дека Европска Унија одблиску го следи судскиот случај со Кежаровски, но не коментира за индивиудални случаи.
– Медиумската слобода е екстензивно покриена во извештајот за напредокот на поранешната југословенска република Македонија, истакнувајќи ги проблематичните области како владиното рекламирање, необјективното медиумски известување за време на избори, улогата на јавниот сервис и клеветата. Сево ова, покрај воведувањето ново медиумско законодавство на крајот на 2013 година. Со оглед на нивото на загриженост за кое алармираат гласови во и надвор од државата, но и постојаниот пад на државата во сите големи релевантни рангирања за медиумска слобода, едноставно не е кредибилно да се игнорираат идентификуваните проблеми – изјави за „Мета“ портпаролката на Европската комисија, Маја Коцијанчиќ.
Европскиот комесар за пристапни преговори, Јоханес Хан, ќе ја посети Македонија на 19 и на 20 февруари, потврдија за „Мета“ од Европската комисија.
Т.М.