Компанијата ЕЛЕМ информира дека утре во Дебар ќе има прекин во снабдувањето со електрична енергија од 10 до 18 часот, заради сервисирање на трансформаторот преку кој градот се снабдува со струја.
„Станува збор за редовно сервисирање на регулациона склопка од регулациониот 110/35 киловолтен трансформатор кој се наоѓа во хидроелектраната Шпилје, која постапка почна минатата недела и за која е потребно подолго време поради настанат дефект на дел од опремата. Сервисирањето го врши овластениот сервисер „Кончар ИНГ“ од Хрватска, кои во најкус рок обезбедија резервен дел, и истиот ќе го заменат во трансформаторот во текот на утрешниот ден“, се вели во соопштението на ЕЛЕМ.
Од компанијата нагласуваат дека сервисирањето е од најголемо можно значење, имајќи предвид дека без регулациона склопка постои ризик од избивање на мрежата, настанување на целосно оштетување на електичните апарати на корисниците, долготрајно останување без струја на Дебар и сериозни можни последици за целиот електроенергетски систем на земјата со загрозување на неговата стабилност.
„Од тие причини, зафатот во текот на утрешниот ден е неопходен и граѓаните се замолуваат за трпеливост и соработка со институциите заради своја лична сигурност и сигурност на нивниот имот“, се додава во соопштението.