Демократскиот сојуз (ДС) ги повика граѓаните, граѓанските асоцијации, експертите, медиумите и политичките партии, преку демократски средства да ја блокираат реализацијата на еврообврзницата од 650 милиони евра.
– Тргнувајќи од фактот дека задолжувањето го прави влада која е техничка и која за десетина дена ќе биде сменета, како и барањето на мнозинството граѓани да не се задолжува повеќе државата, апелираме до банките потенцијални купувачи на еврообрзницата и до меѓународните финансиски институции, да не ризикуваат и да ја блокираат реализацијата на еврообврзницата, независно од моменталната примамливост за висок профит – вели Павле Трајанов од Демократски сојуз.
Трајанов ги повика пратениците од опозицијата заедно да побараат одржување вонредна седница на Собранието, на која ќе се расправа за еврообрзницата и за вкупниот долг на државата, а за што се потребни најмалку 20 пратеници.