По две недели пауза, Собранието денеска одржа пленарна седница на која пратениците гласаа за осум закони по скратена постапка, но со потешкотии во обезбедувањето на кворум бидејќи пратениците на ВМРО-ДПМНЕ и покрај координациите одлучија и понатаму да ја бојкотираат работата на законодавниот дом.
За време на седницата, претседателот на Собранието, Талат Џафери неколку пати имаше проблем да обезбеди кворум на присутни пратеници па во 12.20 часот даде пауза до 13 часот и координатите на пратеничките групи ги повика кај него на координација.
По паузата, во Собранието повторно немаше доволен број на пратеници, бидејќи фалеа дел од пратениците на ДУИ.
Џафери директно му се обрати на координаторот на ДУИ, Ејуп Алими, прашувајќи го каде му се пратениците.
-Ејуп каде ти се пратениците? Вие сте координатори, треба да ги координирате пратениците. Ако не можете да си ја вршите работата треба да кажете – рече Џафери и за кратко време во салата беа присутни 63 пратеници.
Пратениците пред паузата која ќе трае до 15.30 часот по скратена постапка ги изгласаа изменувањата и дополнувањата на законите за пензиското и инвалидското осигурување, на Изборниот законик, на Законот за градење, на Законот за вработените во јавниот сектор, на Законот за Управата за јавни приходи, на Законот за придонеси од задолжително социјално осигурување, на Законот за даночна постапка и на Законот за сигурност во железничкиот систем.