Безбедносната ситуација по случувањата во Куманово, освен на одложувањето на голем број настани и манифестации, влијаеше и на фреквенцијата на луѓето низ трговските центри, парковите и на места во градот кои вообичаено се раздвижени.
Имајќи предвид дека дел од трговските центри, од страна на челните луѓе, беа посочени и како мета на терористите, тоа влијаеше луѓето да ги избегнуваат овие места.
При посетата на трговскиот центар „Сити мол“, забележавме слаба раздвиженост и малку луѓе.
И вработените во дуќаните велат дека има помалку луѓе од вообичаено.
Во позната продавница за облека од препознатлива марка велат дека прометот овие денове е трипати помал од вообичаениот, а и фреквенцијата на посетители е помала.
Исто така, од познат синџир продавници за чевли велат дека прометот е ист, но дека има помал број на луѓе. Тие сметаат дека прометот се должи на сезоната на матури.
Управата на „Сити мол“, од друга страна, вели дека „центарот работи сосема нормално“.
– Деновиве трговскиот центар работи сосема нормално, сите планирани активности во него се реализираат и засега не е забележан пад на посетители – изјавија за „Мета“ од „Скопје Сити мол“.
Малку луѓе, што е сосема разбирливо, викендов имаше и во Градски парк, на Водно, на Матка, места кои вообичаено се преполни.