Битолската полиција потврди дека синоќа група граѓани се собраа пред домот на активистот на „Битолско движење“, Илија Балтовски, во населбата Недопирливи.
Според портпаролот на СВР-Битола, Сања Стаматова, група граѓани се собрале пред неговата куќа, скандирајќи, но до инцидент не дошло.
– Нема инцидент, како настан само е заведено дека група луѓе отишле на улицата 12 Кладенци – рече Стаматова.
На својот фејсбук-профил, пак, Балтовски напиша дека ако демонстрантите имале намера да го заплашат, ја згрешиле адресата.
„Детето е родено, не можете да го вратите назад. Мојата адреса не е единствена, не постојат толку наредби, СМС-пораки, наредби од штабови, притисоци, колку што има адреси на слободоумни граѓани. Затоа не трошете си го вашето драгоцено време. И за крај, морам да ѝ се заблагодарам на полицијата, што во ваков момент го заштити домот на еден маж, една жена, едно 12-годишно дете и еден пар старци (мајка ми и татко ми), на кои им се восхитувам на нивната храброст. Смрт на фашизмот, слобода на умот“, напиша Балтовски на „Фејсбук“.
Тој додава и дека пред некој ден, јавно, на собирите за оставка и против аболиција, предупредил дека ако сега не се избори народот за слобода, тогаш нареден чекор на власта е да почне да доаѓа дома и да малтретира.
Очевидци тврдат дека синоќа толпата што се собрала пред домот на Балтовски пцуела и плукала во неговиот двор. Извикувала и негодувала поради неговата герила-акција, кога со лажни евра беше пречекан градоначалникот на Битола, Владимир Талески.