Пациентите на штипската Клиничка болница добија нови кревети со душеци, донација од невладината организација од Австрија, „Хил колде“.
Болницата доби и опрема и лекови вредни 300.000 евра. Во донацијата, што денеска ја предадоа, има и апарати за ЕКГ, инвалидски колички, инкубатори, бироа, но и постелнина.
Иницијатор на донацијата е Јонче Атанасов од општината Конче, кај Радовиш, кој неколкупати вршел транспорт на донациите на оваа невладина организација во земјите од регионот.
– Ова е 45. хуманитарен транпсорт во рамките на нашето 10-годишно постоење. Досега вакви донации имавме во Косово, Унгарија, Словачка, кога и беа поплавите во Србија. Се надевам дека оваа прва донација за болница во Македонија нема да биде и последна – рече на предавањето на донацијата, Марта Рајтер од „Хил колде“.
Директорот на Клиничката болница, Александар Стојановски, изјави дека опремата ќе најде место во сите одделенија.
– Целокупната опрема значи подновување на некои од нашите одделенија, особено за интензивна нега, кома-центарот, одделот за физикална терапија, каде ќе биде однесен дел од опремата – изјави Стојановски.
Ова е една од поголемите странски донации во последните години за Клиничката болница во Штип.