Основачот на „Викиликс“, Џулијан Асанж, ја објави изјавата дадена за шведското обвинителство во која тврди дека не извршил сексуална злоупотреба пред шест години за време на посетата на Шведска.
Во изјавата која е објавена во светските медиуми тој негира дека имал сексуален однос без заштита со една жена додека таа спиела.
Тој рече дека тоа бил доброволен сексуален однос на две возрасни лица и остро ги критикуваше шведските обвинители. Неговиот адвокат Џенифер Робинсон потврди дека изјавата е автентична.
Портпаролката на обвинителството во Шведска изјави дека не може да ја коментира истрагата. Таа наведе дека обвинителите го чекаат транскриптот од сослушувањето на Асанж кое го извршиле еквадорските службеници во амбасадата на Еквадор во Лондон минатиот месец.
Асанж побара засолниште во амбасадата на Еквадор пред повеќе од четири години.